Gouritz-nuus‎ > ‎

Sleephelling het weer 'n jetty!

posted 19 Dec 2011, 11:45 by Admin Gouritzmond   [ updated 23 Dec 2011, 08:08 ]
Op 10 Desember 2011 kon daar na jare weer by 'n jetty aangedoen word, by die sleephelling op Gouritsmond.

Die eerste gebruiker doen aan

Histories was daar twee jetties by die Gouritsmond sleephelling. Een was 'n private jetty van 'n Mnr Maggs en die ander was deur plaaslike inwoners van Gouritsmond gebou. Met die Laingsburgvloed in 1981 het altwee jetties ongelukkig weggespoel. Een is herbou deur die plaaslike raad in 1997, maar is teen ongeveer 2002 weer weggespoel.

In 2005 is die proses om die area by die sleephelling op te gradeer, begin. Hiervoor moes toestemming vanaf die Dept Omgewingsake (Wes Kaap Provinsie) verkry word. Die departement het egter vereis dat die sleephelling eers registreer word, aangesien die sleephelling in 'n sensitiewe area (soutmoeras) geleë is. Na onderhandelinge met die  Munisipaliteit, is die Gouritsrivier Bewaringstrust toe gevra om die aansoek te doen.

Die tydlyn van gebeure was soos volg:
  • 2005 - begin aansoek vir registrasie van sleephelling
  • 4 Oktober 2010 - sleephelling registrasie goedgekeur
  • 2 Des 2011 - toestemming om te herbou toegestaan deur Dept Omgewingsake Weskaap
  • 5 Des 2011 - konstruksie begin
  • 10 Des 2011 - konstruksie voltooi
Wys jou hoe vinnig dinge kan gebeur sodra die burokratiese prosesse afgehandel is!

Grant Blewett en sy span aan die werk

Die befondsing vir die jetty is gedoen deur die Gouritsrivier Bewaringstrust. Die jetty is gebou deur Grant Blewett van Aqua Deck Construction. Gebruikers sal oplet dat die jetty ietwat moeilik is om op te kom met hoogwater. Dit is omdat die lengte deur die Dept beperk is. Die plan wat oorspronklik ingedien is, was nie aanvaarbaar vir die Dept nie en 'n gewysigde plan met ' n verkorte aanloop, is voorgeskryf. 'n Oplossing vir die aanloop sal weldra gevind word.
Comments